لأهمية الصورة في حياتنا و في عالمنا الحاضر الضاج بهذا الفيض الهائل من التطور التكنولوجي ، لا بد ان يكون للصورة حضورها ، ومنها بالتحديد الصورة الفوتوغرافية ، لذلك ونستنا اليوم مع مصور شاب متميز في كل شيء ، ودود الابتسامة ، بشوش الطلة ، هادي القسمات ، أنيق الحديث ، محبوب من الجميع ، يصور بعقله ، يضحك من قلبه ، انيس في الرفقة ، وكأي بداية للإحساس بالأشياء الجميلة وتلمسها ، عشق ضيفنا التصوير منذ الصغر، ومارسها كهواية وموهبة إبداعية ، والتقط صورا مميزة ، واقتنص الكثير من اللحظات التي لا تتكرر، خريج جامعة العلوم والتقانة قسم علوم حاسوب ، عضو مؤسس في مجموعة المصورين السودانيين ، ناشط في العمل الطوعي ، هذا الحوار بمثابة تسلط الضوء علي بداياته، تجربته الفنية ، رحلته مع الكاميرا ، مرحباً بكم في عالم ( ود التوم ) .
حوار : عبدالسلام الحاج - الاء مسيس
محمد التوم في صور ؟
زول بسيط بحب الحياة ، احترام للانسانية تفاصيل كتيرة ، مليان بحب الوطن وبطيبة وجمال ناسو ، والجمال دا هو اللي بخلينا نتعايش فيهو ، انا محمد عثمان محمد التوم ، سكن في بحري الشعبية جنوب .
متى بدأت حكاية محمد التوم مع التصوير ؟
تقريباً قبل سنتين كدا ، اي في نهاية عام 2010 ، وكان في حب للتصوير من زمان ، زادت بعد ان تعرفت على المصور الجميل واستاذي في التصوير وفي الحياة الفنان الانسان علاء خير ، احب اوصل ليهو التحية من المساحة دي .
مصورين لفتوا نظرك في بدايتك واستنبطت أفكارك منهم ؟
ماشاء الله في الساحة في مصورين كتار داخليا وخارجيا ، كل واحد فيهم بتميز بي حاجة ، ودي خلتني استفيد من اختلاف المدارس بتاعتهم ، ولسة بتعلم منهم الكتير ولازلت ، كذلك استفدت جدا من وجودي ضمن مجموعة المصورين السودانييين ، من هنا انا بشكرهم فردا فرد ، ياخ ديل شباب رائعين بكل معني الكلمة .
أول كاميرا اقتنيتها ما هو نوعها ، و ماهو نوع الكاميرا الحالية؟
اول كاميرا اقتنيتها كانت كوداك كي 4 فلم ، والكاميرا الحالية نيكون دي90 .
مصادر إلهامك في التصوير ؟
مصادر الهامي كتيرة منها ، الشارع السوداني ، المناظر الطبيعية ، تفاصيل الحياة اليوماتي ، جمال روح الانسان في حد زاتو، الملامح ، والوجوه اللي هي في حد زاتا اكبر مصدر للألهام ،لان كل وجه وراهو قصة قائمة بي زاتا .
هل اخذت دورات تدريبية في مجال التصوير ؟
بتعلم لسة التصوير من خلال الشوف الكتير لأعمال المصورين والقراية من خلال الانترنت ، ومن التجربة والخطأ وتصحيح الخطأ ، بخصوص الدورات التدريبية حضرتا ورشتين اقاموها مجموعة المصورين السودانيين في البيت الياباني ، وايضا حضرت ورشة قدمها المصور علاء خير وضياء خليل ، وايضا كنت سعيد بأن اكون ضمن المشاركين في ورشة قدمها التشكيلي والمصور الفنان عصام عبد الحفيظ والمصورة الالمانية كلاوديا وينز في المركز الثقافي الالماني ( معهد جوته ) استفدتا جدا من كل هذه الدورات التدريبية والورش.
كيف ترى نظرة المجتمع ليكم كمصورين ؟
الحمد لله في الفترة الاخيرة النظرة بقت احسن من اول ، لأن ثقافة التصوير انتشرت بصورة كبيرة ، واصبح هنالك تقبّل من المجتمع ، بس ممكن القبول دا في مرات برجعنا لي عدم القبول ، لأنو بتصرف واحد مامقبول بيتعكس علينا كلنا ، فأتمنى من المجتمع انو ما يحكم على الكل بتصرف الافراد ، وايا لازم نكون حريصين كمجتمع مصورين اننا ننقل الافضل لمجتمعنا عشان ثقافة التصوير تمتد وتكبر وتكون حاجة مؤصلة في المجتمع .
التكنولوجيا ساعدت في تسهيل التصوير ، كيف تنظر لذلك ؟
اكيد ساعدت جدا لأنو بقى من خلال الانترنت ممكن تتواصل مع مصورين عالميين ، وممكن تتعلم من صفحات كتيرة فن التصوير، وغير كدا اتاحت فرصة الشوف الكتير اللي بيتيح ليك تتعلم حاجات كتيرة ، ياخ انا بستمتع جدا بانو اتفرج على الصور ، فالحاجة دي التكنولوجيا اتاحتها لينا من خلال مواقع كتيرة جدا .
ود التوم والفلاتر والفوتوشوب ؟
الحاجة دي بتختلف من مصور لي مصور ، ولكل مصور منهج في التصوير ، وكل مصور بنقل جمال وقصة الصورة بطريقة معينة ، مع احترامي لي كل المدارس فانا عن نفسي بشوف استخدام الفلاتر والفوتوشوب مهم لعكس وابراز بعد اخر في الصورة ، مدام بستخدم الفوتوشوب بطريقة صحيحة و نقل تفاصيل جميلة ، كدا يعني الاساس هو الصورة وبعد داك نقلها باحساس معين عند المصور من خلال الفوتوشوب داير تقول شنو من خلال صورك ؟
دا سؤال صعب لكن ممكن اقتبس بعض من كلمات لويس هن الذي قال ( اذا كنت استطيع ان اروي القصة بالكلمات عندها لا حاجة لحمل الكاميرا ) بحاول من خلال الصور اعكس القيم والاخلاق الجميلة الموجودة في بلدنا ، وعكس السودان بصورة افضل للخارج .
الي اي مدي يمكن للتصوير ان يساهم في توصيل المفاهيم الاجتماعية الايجابية ؟
في مقولة قالا بيرنيس آبوت انو ( التصوير يساعد الناس على الرؤية ) وانا مؤمن تماما انو الصورة ممكن تكون ليها تاثير كبير في المجتمع ، ممكن من خلال صورة تحرك حاجات كتيرة وتعالج كثير من القضايا وممكن توصل رسائل كتيرة جدا ايجابية.
ما هو شعورك عندما تمسـك الكاميرا ؟
هههههههه شعور سمح خلاص ، مابتوصف مرات الزول لو شاف نفسو وهو بتصرف مع الكاميرا دي كيف بالجد بقول على نفسو مجنون ، ياخ ببساطة كدا التصوير دا حاجة جميلة شديييييد.
بورتسودان ومحمد التوم ؟
ياسلاااااااااااااام استمتعتا جدا بزيارتي ليها ، كانت زيارة موفقة برفقة مصورين واصحاب واخوان رائعين جدا وفنانيين جدا جدا ، واتعلمتا منهم حاجات كتيرة اوصل ليهم التحية من هنا ( المصور الجميل محمد نبيل والمصور الرائع يوسف ود بدر ) ولقيت هناك الكثير من الاصحاب واتعرفتا على ناس جميلين جدا ، لقيت كرم جميل جدا من مجتمع بورتسودان ، كان في متعة في التصوير هناك ، بورتسودان كل حاجة فيها جميل ، اي منطقة زرتها هناك بقت في الذاكرة ، زي ديم عرب ، اركويت ، سواكن ، والكورنيش ، ويا سلااااااااااام على كرم اهلنا الادروبات ، هناك شربنا معاهم الجبنة الجد جد واكلنا السلات وحاجات كتيرة كدا سمحة ، اكتر حاجة كنت مستمتع بيها هي لهجة انسان الشرق الجميلة ( كيف الهال ... الجبنة تشرب ... اتفدل ... ايتانينا ... دبايوا ) بطريقتهم المميزة ، ياسلااام ياخ ، بورتسودان مدينة ضد النسيان .
حكاية محمد التوم مع العمل الطوعي ؟
العمل الطوعي هو اللي بحسسك بقيمتك كانسان ، بتتجرد فيهو من الانا ومن حاجات كتيرة كدا وبتعزز فينا روح الجماعة والمساعدة والشعور بالاخرواحترامه ، وبتثبت قيم واخلاق كتيرة جدا ، من هنا بحيي كل المجموعات الفعلاً هم قدر كلمة العمل الطوعي ، كم احترمهم رجال ونساء وشباب كانوا دوما ومازالوا سبّاقين لمد يد العون للجميع ، ومن غير ذكر اسماء ربنا يجعلا في ميزان حسناتهم جميعا على قدر ماقدموهو ومايقدموهو ، وشكرا لأنهم ادوني فرصة اساعد معاهم في الخير دا ، وبالنسبة لي اضاف لي الكتير ومازال ، ورغم اني مقصر في الفترة الاخيرة لمشاغل الحياة بس كل ما لقينا طريقة بنشارك ، لأنو استخدام الكاميرا لنقل الحاجة دي دا هدف سامي جدا لتوصيل رسائل للمجتمع بتعزيز قيمة العمل الطوعي ، وربنا يصلح الحال ونكون دايما ملمومين في الخير .
حدثنا عن زيارتك لأريتريا ؟
اريتريا بلد جميلة جدا جدا ، تعرف انو الجميل في الموضوع هو الانسان الاريتري ، انسان راق جدا وبفرض عليك انو تحترمو جدا ، سلوك الانسان وطريقتو وتصرفاتو هي البتخليك تحب المكان ، واريتريا البلد في حد زاتا جميلة جدا ، استمتعتا جدا بالزيارة صورت صور كتيرة ، فيها ذكريات لطيفة اتعرفتا فيها على مصور جميل هناك اسمو ( هاقوس ) وكوّنتا علاقات لطيفة جدا مع اسرة اريترية لحدي الان متواصل معاهم ، واتعلمتا لي كم كلمة كدا بالاريتري مما جيت بقولا لي اصحابي عذبتهم بيها عذاب ( دحندو) وتعني سلام ( كيمي اللخا ) وتعني كيف الحال (سبوغ) وتعني تمام ، وزرتا مناطق اتمنى انو اي زول يمشي هناك يزورا زي (دورفو .. مصوع .. مايساروا) .
موقف طريف مر بك كمصور ؟
هههههههههههههه مواقف كتيرة ، ممكن احكي ليك موقف ، مشيت يوم اصور في الموردة واثناء ما انا ماشي وبصور وانا مندمج في التصوير وماحاسي بي نفسي فجأة ظهروا لي عدد 4 كلاب هاجوا ليك فيني ، نوع الكلاب المتعبين ديلك البكونوا مصرين الا يعضوك حتى يرتاحو ، وخلاص انا الوقت داك قولتا دي نهايتي لاعرفتا اجري ولا عرفتا اقيف ، للضمان كدا اتبشتنا بشتنا شديدة ، وخشيت في الطين والحمد لله مرقتا سليم من العض بعد ماجا شافع شكلو كانو الكلاب تابعين ليهو ، ساقهم زي الماحصل شي ، وانا بكبري دا كلو اتبهدلتا والشافع بضحك فيني ، وانا جواي لسان حالي بقول ليهو الله يسامحك انت وكلابك هههههههههههه .
ما هي المعوقات التي صادفتك في مشوارك مع التصوير ؟
المعوق الاساسي ولازال هو ( ممنوع الاقتراب والتصوير ) ، انا ماعارف دي سياسة الدولة ولا سياسة افراد في فكرة التصوير ، يعني انا هوايتي التصوير الفوتوغرافي ، في اماكن كتيرة حابي اصورا ، عاوز انقلها من خلال الكاميرا بصورة جميلة للعالم ، ونوريهم هويتنا ملامحنا وقيمنا وعاداتنا وحاجاتنا السمحة ، فمرات كتير مابنقدر ننقل الحاجة دي بارتياح ، لأنو في اماكن كتيرة تكون داير تقيف تصور فيها يقولوا ليك ممنوع التصوير ، رغم انو في اماكن بتكون عادية جدا، وعشان تشرح الحتة دي للعسكري البوقفك عن التصوير مابيتفهم منك الحتة دي ، والموضوع دا بيلاقينا بصورة مستمرة ، ممكن اديك مثال ، مرة انا مشيت مكان عشان اصور وكان المكان دا عبارة عن حتة فيها موية وشجر وبس ، مافي اي حاجة تاني ، جاني ليك عسكري من هناك وقال لي انت بتعمل في شنو ؟؟ قولتا ليهو بصور ، قال لي بتصور ليه ، قولتا ليهو انو انا هاوي تصوير وبحب اوثق للبلد واعكس جمال السودان من خلال الصور ، اول حاجة قالا لي : هاوي!! باستغراب كدا ، هاوي كيف يعني !!؟؟ وبعد داك حدّث ولاحرج ، منعني اصور نهائياً في المكان داك ، اضطريت امشي وانا في داخلي كمية من الاستفهامات والتساؤلات ، والقصة تطول ، عندنا معاهم مواقف كتيرة جدا ، لكن على قدر المعوقات دي بنحاول وربنا يقدرنا على المواصلة في الهواية دي ، واتمنى انو يكون في تفهم للمصور ويدونا حرية اكتر في التعبير ، ونقل حبنا للبلد بطريقتنا افضل من خلال التصوير، وانا مؤمن بقدرة المصور السوداني على التميز والتفرد في اي مكان .
العائد المادي من التصوير ضعيف لكن رغم ذلك تصورون ؟
اهو هواية وبنحبها عشان كدا مواصلين على قدر الفي ، بالرغم من الظروف الاقتصادية الصعبة بتهزم المصورين كثيرا ، ، لكن الحاجة دي تغلبنا عليها بروح المشاركة وتبادل ادوات التصوير ، بنكافح عشان هواياتنا ، وربنا يقدرنا نواصل ونلقى القبول المناسب .
ما هي المعارض التي شاركت فيها ؟
شاركت في الكثير من المعارض ، منها معارض خيرية بالتعاون مع مجموعات في العمل الطوعي مثال ( مجموعة نحن ، ديل اهلي ، مجموعة بسمة ، ومجموعات اخرى ) ، كذلك شاركت في معرض مجموعة المصورين السودانيين الاول (فيجوال ارت ) في بابا كوستا ، وايضا شاركت في معرض مجموعة المصورين السودانيين بالتعاون مع المركز الثقافي البريطاني في معرض الخرطوم الدولي ، وفي معرض بالمركز الثقافي الالماني .
طبيعي أن تكون صورك محببة إلى قلبك ، لكن ما هي الصورة الأقرب لك ؟
المحبب الى قلبي صور الغير، صور كتيرة لمصورين بستمتع بيها جدا وقريبة الي قلبي ، لكن ممكن اذكر ليك صورة صورتها في بورتسودان في منطقة اركويت، صورة لي رجال كبير في العمر جميل في كل شي ، مليان بالحب والبساطة والامل ، دي ماحنساها كلو كلو، ادت معنى مريح بالنسبة لي في الصورة.
ما هي الصورة التي تحلـم بالتقاطها ؟
صورة ممكن تدخل سرور لي انسان ، صورة بتثبت قيم واخلاق ورسائل ايجابية ، صورة بتعالج قضية ، اتمنى وبحلم انو اقدم صورة جميلة عن السودان الى العالم.
ماذا اضاف فن التصوير لمحمد التوم ؟
التصوير ليس مجرد توثيق ولكنه في نفس الوقت إحساس وفكرة وموقف واقتناص لحظة ، قد يكون شعورا داخليا يبحث عن ضوء لترجمة ما في النفس ، والتصوير اضاف لي الكثير، حاجات كتيرة الزول كان بمر عليها ساي التصوير بخليك تدقق فيها ، التصوير بيعلمك الاهتمام بالتفاصيل، وبخليك تعاين بزواية مختلفة وجميلة ، وتثبت معاني جمالية كتيرة جدا ، وكمان بجد في التصوير متعة ومتنفس ، من خلال التصوير والصورة ممكن تمتلك العالم بعاداتو واختلافاتو وتفاصيلو الجميلة ، من خلال صورة ممكن تصورها و وراء الصورة دي يكون في قصة بتعلمك الكثير من الاشياء الجميلة .
هل تخطط لمعرض خاص بك؟
بميل دايماً للمعارض الجماعية بلقى فيها نفسي اكتر لأنو فيها روح الجماعة والمشاركة ، لكن مالو ان شاء الله لي قدام نقدر نعمل معرض وينال رضاكم .
أشياء لا تزال ترغب في تحقيقها وتسعى إليها ؟ طموحاتك ؟
لو ربنا مد في العمر ، اختصر اجابتي في مقولة الشاعر محمود درويش (على هذه الأرض ما يستحق الحياة).
هذا الحوار نشر في صحيفة الصحافة 11-1-2013
عبدالسلام الحاج
مدون ومستشار للسوشيال ميديا والمحتوى الرقمي ، عضو شبكة مدونون سودانيون بلاحدود وشبكة مدونات عربية، نشرت كتاباته في عدد من الصحف والمجلات السودانية، وله مساهمات في عدد من المواقع والمجلات الإلكترونية العربية والعالمية، مهتم بالإعلام الرقمي ،الفنون والحراك الثقافي المستقل.
good luck in your life bro , wishin u all the best inshallah
ردحذفمحمد توم ... الزول الجميل ... الإنسان
ردحذفتمنياتي ليك بالتوفيق والسداد